बादलका छोराले भने– शरणार्थी प्रकरणमा न्यायालयकाे सम्मान स्वरूप अनुसन्धानलाई इमान्दारीपूर्वक सहयोग गर्छु

काठमाडौँ – पूर्व गृहमन्त्री एवम् नेकपा एमालेका उपाध्यक्ष रामबहादुर थापा बादलका छोरा प्रतिकले नक्कली भुटानी शरणार्थी बनाएर नेपालीलाई अमेरिका पठाउने धन्दामा आफ्नो संलग्नता नरहेको दाबी गरेका छन् ।

बिहीवार विज्ञप्ति जारी गर्दै प्रतीकले यो प्रकरणमा आफ्नो नाम जोडिएकोमा खण्डन गर्दै सम्बन्धित निकायले गर्ने अनुसन्धानमा इमान्दारीपूर्वक सहयोग गर्ने बताएका हुन् ।

विज्ञप्ति जारी गर्दै उनले भनेका छन् ‘मेरो संलग्नता नरहेको शरणार्थी प्रकरणमा पनि झुटो आरोपसहित मेरो नाम जोडिएकोप्रति खेद प्रकट गर्दै खण्डन गर्दछु’, उनले विज्ञप्तिमा भनेका छन्, ‘ तर, संवेदनशील विषय भएकाले आरोप लगाइएका विषयमा सम्बन्धित निकाय, न्यायालयप्रतिको आस्था र सम्मान स्वरूप अनुसन्धान प्रक्रियालाई इमानदारीपूर्वक सहयोग गर्ने प्रतिबद्धता व्यक्त गर्दछु ।’ उनले  केही सञ्चारमाध्यमले गलत उद्देश्यका साथ आफू विरुद्ध तथ्यहीन प्रचार गरिरहेका आरोप समेत गलाएका छन् ।